პინა • PINA • ონლაინ მაღაზია შენი ოჯახისათვის

მოგესალმებით, მე ვარ ერთი პინა. მე სიცილი მინდა… ოღონდ თქვენთან ერთად ❤ ამიტომ შევეცდები ჩემი ისტორიით ოდნავ მაინც გაგამხიარულოთ 😊

დავიბადე 1994, არა გატყუებ, 95 წელს. ეს ისეთი პერიოდი იყო, რომ ჩემს დაბადებას არც შუშხუნები მოყოლია და არც გახეხილი ყველის შესანახი კონტეინერი. სამაგიეროდ, მოყვა მახარობელი, რომელიც ჩემი დანახვისას დაიბნა და უბრალოდ იყვირა – ბავშვია, ბავშვიიი…

ღარიბი გლეხის ოჯახში არა, მაგრამ მაინც გავიზარდე. ბავშვობა გავატარე ისეთ პერიოდში, როცა სახლში შუქი უფრო იშვიათად მოდიოდა, ვიდრე ინკასატორი. ბედის ირონია იყო, რომ დენი გადაბმულად 2 დღით მხოლოდ ახალ წელს მოდიოდა და იმ დროსაც ტელევიზორში “ბედის ირონია” იყო.

სკოლაში სწავლით თავს არ ვიკლავდი, მაგრამ ოქროს მედალი მაინც ავიღე… თუმცა დირექტორმა მალევე დამინახა და ისევ უკან დავაბრუნე. სკოლის შემდეგ ჩავაბარე ივანე ჯავახიშვილის სახელობის თბილისის სახელმწიფო უნივერსიტეტის ეკონომიკისა და ბიზნესის ფაკულტეტზე, ანუ მაღლივში.

უმაღლესში სწავლის დასრულების შემდეგ, კომისარიატში დამიბარეს, მაგრამ ტერფიდან დაწყებული, მთლიანად ბრტყელი ვიყავი და მალევე გამომიშვეს.

მერე გადავწყვიტე დამეწყო ვარჯიში და სწორი კვება. 6-ის მერე საერთოდ აღარ ვჭამდი… 6 დეკემბრის მერე… ეს იყო ყველაზე რთული 20 წუთი ჩემს ცხოვრებაში.

მაგრამ დღეს ჩემს ცხოვრებაში ახალი ეტაპი იწყება. საინტერესო და გამოწვევებით სავსე პერიოდი. მე მუშაობა დავიწყე და ახლა, სწორედ თქვენს თვალწინ ვდგამ პირველ ნაბიჯებს. სწორედ ესაა ჩემი პირველი სამსახური და უკვე სრულიად მზად ვარ, გემსახუროთ 😊